多事之秋，一旦貴公司躺著也中箭引來網絡關公危機😩，點算好？好多人會語帶輕佻話：中和（Neutralization）網上關公災難囉，有幾難喎！有返幾十個假 Account 做鍵盤戰士就得啦！
講就易，但到底點做呢🧐？市面上有啲公司提供此服務，但唔係間間話你知有幾多待機戰士及處理手法。當然各有各做法，無論有公司幫手或夠膽自己出手，想了解多啲鍵盤戰士策略，例如要點做及有咩注意？就要留意以下嘅分析！頭盔 mode：我都係聽前輩講嫁咋😝
1. 搶沙發
之前第一篇文章講過，出事後２-４個小時嘅重要性，以留言嚟講頭１５-２０分鐘最重要！如果係自己平台出聲明，可以係出聲明後３分鐘內「搶沙發」😅，做第一個留言，定一定主流語調同風向（要明白人類都係慣咗跟風🤗），最好有人幫手推推俾啲 Emoji 啦📌，點推就自己諗啦，因為 Facebook 會優先顯示較多人俾 Emoji 嘅留言，前輩話咁樣可以傷害減半（如果力度夠強）。
2. 細細力自插一刀
如果受到大傷害攻擊，可試轉下風向輕輕自插，望落去冇咁入肉同分散注意力，例如呀豬媽🐽（假名）服裝店出聲明澄清對本土顧客冇禮貌，好多網友大叫「不了」嘅時候，可以用比較溫和嘅角度插插自己：「老闆娘套衫好麻麻！」及「間鋪嘅交通真係好唔方便！」，令大家開始從花邊角度討論，減低正面攻擊。但呢個方法都好睇時勢同力度，一陣自爆其他問題開多個火頭，兩邊一齊燒仲大鑊，最好有個諗開橋嘅人幫手啦💁♂！
3. 推人利己
同第二招差唔多，不過係推高別人嘅溫和留言，推多幾個都冇所謂，因為只要 Like❤唔洗諗自插內容，可以行動快啲以防止海量留言殺到，如果加埋第二點「自插」打全方位花邊路線咁會安全好強。留言唔怕多，最怕俾人追擊啲入肉位唔放同無限放大。所以借人留言睇定啲，留力再出招亦係其中一個方法。
❌另外有3大事情絕對絕對不能做❌
1. 利己同業攬炒
人性呢家野，有時中咗箭都會諗不如同行攬炒啦，一齊食好過得自己食🤫，於是就有疑似想同業「攬住一齊死」嘅Post。唔計網民真心留言，估計有２-３成都係「別有用心」，例如呀豬媽🐽（假名）服裝店出事後成為被追擊對象，呀豬媽心諗如果Oppa（假名）潮服店都上埋火，咁就唔洗次次得呀豬媽一個食哂。呢個想法就唔要得啦（小編點做就自行決定啦😉），如果呀豬媽已經係時裝界關公龍頭，Oppa出事，人地第一個就諗到對呀豬媽有利，如果露出馬腳俾人流出攬炒過程咁成個品牌就堅「壽終正寢」啦💀！
2. 撥亂反正
總有人以為咁多負評要俾返啲正能量個品牌，留言唱好，為出口氣都可以細細力用 No body 試一個半個留言（但多數會惹上更多留言，會再嬲啲，所以唔建議✖）。千祈千祈千祈唔好太盲撐同其他人發生口角，係自己 Page 發生做就等於火上加油，就算個 Page 唔係自己嘅都唔好咁明顯唱反調，除非…除非你好「𢶣馬」又夠持久力去做鍵盤戰士，否則好易見光死，敗走之後關公就趕極都唔走嫁啦🤦♀！
3. 斬腳趾避沙蟲
自己地頭出 Post 遇上負面留言，應唔應該拆 Post 或拆留言？負面留言就絕對唔好攪，就算想 Hidden 都唔好係出事後頭一個星期內做。事發後２星期當個 Post ２４小時都冇新留言同分享就可試 Hidden 極負留言，起碼有咩事都可以 un-hidden 返。原 Post 就點都要 Keep，當不幸又出事人地實會搵返上次個 Post，搵唔到又會引發另一災難，另外分享過嘅用戶隨時都可以 Click 返條 Link 入去睇，Click 唔到又會出事嫁。
最後，其實做 Neutralization 最緊要係適當時候做適當嘅嘢，講就易但做嘅時候會有千千萬萬個問號❓ 所以以上策略大家有唔明白嘅地方都係搵專業人士處理好啦，如果有需要都可以去公關C子 Facebook 專頁 PM 我📩，大家研究一下先出手啦！一連三篇嘅 #淺談網絡公關災難 嚟到呢度會暫停一陣，嚟緊會有其他 Topic 大家記得留意！
